އެއްދުވަސްވަރެއްގައި ދިރި އުޅުނު ދެމީހުންނެވެ. ފުރަތަމަ މީހާއީ މާތް ﷲ ވޮޑިގެންވާކަމާއި، އާޚިރަތްދުވަސް އަންނާނޭކަން ޤަބޫލުކުރާ މީހެކެވެ. ދެވަނަ މީހާއީ، އިލާހަކު ވޮޑިގެންވާކަން، އަދި އާޚިރަތް ދުވަހަށްވެސް އީމާންވާ މީހެއް ނޫނެވެ. ކޮންމެއަކަސް، މި ދެމީހުންނީވެސް މިސާލީ ދިރިއުޅުމެއް އުޅުނު ދެމީހުންނެވެ. ވަރަށް އަބުރުވެރި ރީތި ދިރިއުޅުމެކެވެ. ފުރަތަމަ މީހާ މިފަދައިން ދިރިއުޅުނީ އޭނާގެ ވެރި ﷲ ހަޟްރަތުން އެކަމުގެ އުޖޫރަ ( ޖަޒާ) ލިބޭނޭ ކަމަށްޓަކައެވެ. ދެވަނަ މީހާ މިފަދައިން ދިރިއުޅުނީ އޭނާގެ އަވައްޓެރިންނާއި އިންސާނީ މުޖުތަމަޢުގެ ޙައްޤައްޓަކައެވެ. މިހާރު މި ދެމީހުން ނިޔާވިތާ ފުރިހަމަ 200 އަހަރަށްވުރެ ގިނަ ދުވަސް ވެދާނެއެވެ. ފުރަތަމަ މީހާ ކަށްވަޅުގައި އޮވެގެން އެހެރަ އިންތިޒާރުކުރަނީ އޭނާގެ ވެރި އިލާހުގެ ދަރުބާރުން އޭނާގެ ހެޔޮކަމުގެ އުޖޫރަ ލިބުންވާ ދުވަހަށެވެ. ދެވަނަ މީހާ ނެތިފަނާވެ ދިޔަތާ ކޮން ދުވަހެއްހެއްޔެވެ؟ އޭނާ ދަންނަ ބަޔަކުވެސް އޭނާގެމަތިން ހަނދާންކުރާ ބަޔަކުވެސް ނެތެވެ. ވިދާޅުވެބައްލަވާށެވެ. މިއަދު އޭނާގެ އެ ކީރިތި މޫރިތި، މިސާލީ ދިރިއުޅުމުގެ ބޭނުމަކީ ކޮބައިހެއްޔެވެ؟ ދުނިޔަވީ އުފާތަކުން އޭނާގެ މުޖުތަމައުގެ ޙައްޤައްޓަކައި މަހުރޫމުވެގަތީ އެ ދިރިއުޅުމުގެ ކޮން މާނައެއް އޮވެގެން ހެއްޔެވެ؟؟
