ޒަމާނީ ޑިމޮކްރަސީއަކަށް ދިވެހި ޤައުމު އަލިވިލުމާއެކު މާތްވެގެންވާ އިސްލާމްދީނާ، ދިވެހި ޤައުމިއްޔަތުގެ ދިފާޢުގައި އެތަކެއް ސިޔާސީ ޕާޓީއެއް ދިވެހިރާއްޖޭގައި ރަޖިސްޓަރީ ކުރެވިގެން ދިޔައެވެ. ކޮންމެ ޕާޓީއަކުންމެ ދައްކަމުން ދިޔައީ ރާއްޖޭގެ އިސްލާމީ ވަޙްދަތު ފުނޑުފުނޑުވެފައިވާ ކަމުގެ ވާހަކައެވެ. ރައްޔިތުންގެ ޙައްޤުތައް ގެއްލިފައިވާކަމުގެ ވާހަކައެވެ. އިސްލާމީ ވަޙްދަތާއި، ޙައްޤުތައް ގެއްލިފައިވާ ނިކަމެތި ރައްޔިތުންގެ ޙައްޤުތަށް ހޯދުމަށް މަސައްކަތް ކޮށްދޭނެކަމުގެ ވާހަކައެވެ.
ޝައްކެއްނެތެވެ! ޕާޓީތަކުގެ މަޤްޞަދު ކިތަންމެހާވެސް ރަނގަޅެވެ. އެހެނެއްކަމަކު ޤަބޫލުކުރަންޖެހޭ ޙަޤީޤަތަކީ އެއްވެސް ޕާޓީއެއް ހުރިހާގޮތަކުން އެންމެ ފުރިހަމަ ޕާޓީއަކަށް ނުވާނެކަމެވެ. ތިމާ ކިތަންމެ ރުހޭ ޕާޓީއެއްކަމުގައި ވިޔަސް އެއްވެސް ކުށެއްނެތް މުޅީން މައުސޫމުކަން ލިބިގެންވާ ޕާޓިއަކަށް އެ ޕާޓީ ނުވާނެ ކަމެވެ. ހިތާމަޔަކީ މި ޙަޤީޤަތާ ކުރިމަތިލާން އަޅުގަނޑުމެންގެތެރެއިން ވަރަށް ގިނަމީހުން ފަސްޖެހޭކަމެވެ. ނުވަތަ ބޭނުން ނުވާކަމެވެ. ފާޅުވެ ފެންނާން އޮތް ޙަޤީޤަތެއްގެ ކުރިމަތީގައި ކަނު މީހަކު ކަމުގައި ވެގަންނަ ކަމެވެ.
2008 ނޮވެމްބަރ 11 ވަނަ ދުވަހު ދިވެހިރާއްޖެ ކުރިމަތިލީ ރިޔާސީ މުޅިން އައު ދައުރަކަށެވެ. މުޅިން އައު ވެރިޔެއްގެ ޒަޢާމަތާއެވެ. އެއިގެ ކުރިން 30 އަހަރު ވެރިކަން ކުރަމުންދިޔަ ވަލިއްޔުލް ޢަމްރުގެ ވެރިކަން ދިވެހިން ނިންމާލީ ހެޔޮ ބަދަލަކަށްޓަކައެވެ. ދިނީގޮތުން ކުރިމަތިވެފައިވާ ގޮންޖެހުންތަކާއި ހުރަސްތައް ނަގާ އެއްފަރާތް ކުރުމަށްޓަކަވެ. ގެއްލިފައިވާ ޙައްޤުތައް ރައްޔިތުންނަށް އަނބުރާ ލިބިދިނުމަށްޓަކައެވެ.
ފެންނަމުންދާ މަންޒަރާއި އިވޭ އަޑުތަކަށް ބަލާއިރު ވޭތުވެދިޔަ ދެއަހަރެއްހާ ދުވަސްތެރޭ މާލެއާއި ރާއްޖެތެރޭގެ އުމްރާނީ ތަރަޤީއަށް މުޙިއްމު މަޝްރޫޢުތަކެއް ހިންގަމުން އެބަދާކަމަށް ޤަބޫލުކުރެވެއެވެ. މިޙަޤީޤަތް މިގޮތުގައި އޮތުމާއެކުވެސް ޤަބޫލުކުރަންޖެހޭ އަނެއް ޙަޤީޤަތަކީ ވެރިކަން ބަދަލުކޮށްލުމުގެ މައިގަނޑު ދެ މަޤްޞަދުގެތެރެއިން ފުރަތަމަ މަޤްޞަދު ޙާސިލްވަމުން ނުދާކަމެވެ. އަދި މިދަންނަވާ މަޤްޞަދާއި މުޅީން ތަޢާރުޒުވާ އެތައް ކަމެއް މިރާއްޖޭގައި ހިނގަމުންދާ ކަމެވެ. މިކަންތައްތައް ހިންގަމުންދަނީ ދިވެހި ސަރުކާރުންކަމެވެ.
މާލޭގައި ހިތްފަސޭހަ ކޮށްލާނެ ޕާކެއް ހެދުމަށް އެންމެ ރަނގަޅު އެއް ބިމެއްގެ ގޮތުގައި ސަރުކާރަށް ފެނިވަޑައިގަތީ ކުއްލިޔަތުއް ދިރާސާތިލް އިސްލާމިއްޔާގެ ބިމެވެ. ކުއްލިޔާގެ މެނޭޖްމަންޓާ، ކުއްލިޔާގެ ދަރިވަރުންގެ އިތުރުން އެތަކެއް ދިވެހި ރައްޔިތުންގެ ޚިޔާލާ، ޝުޢޫރަށް ކޮޅުފައިންޖެހުމަށްފަހު ކުއްލިޔާގެ ފާރެއް ވައްޓާލައި އެމުއައްސަސާގެ ސިކިއުރިޓީ ގެއްލުވާލުމަށްފަހު މިއަދުގެ ސަރުކާރުން ވަނީ އެތާގައި ޕާކެއް ހަދާފައެވެ. މިކަން ކޮށްފައިވަނީ މިކަމާ ދެކޮޅަށް ރައްޔިތުންގެ މަޖިލީހުން ޤަރާރެއްވެސް ނެރެފައި ވަނިކޮށެވެ.
މާލޭގެ ބިމުގެ ޖާގަ ކުޑަވެ ގޯތި ގެދޮރުގެ ދަތިކަން އިންތިހާޔަށް ފޯރާފައިވުމާއެކު އެކަމައް ހައްލެއް ހޯދުމަށް މާލޭގައި ފެލެޓް އެޅުމަށް ސަރުކާރުން ޚިޔާލު ކުރެއްވީއްސުރެން ފެށިގެން މިއަދާ ހަމަޔަށްވެސް ފެލެޓެއް އެޅުމަށް ސަރުކާރަށް ފެނިލެއްވި އެންމެ ރަނގަޅު އެއްބިމަކީ އަލްމަދުރަސަތުލް ޢަރަބިއްޔަތުލް އިސްލާމިއްޔާގެ ބިމެވެ. މާލޭގައި ސަރުކާރާއި، އަމިއްލަ ފަރާތްތަކުން ހިންގާ އެތައް ސްކޫލަކާއި، ސަރުކާރުގެ އެތައް ބިމެއް އޮތުމާއެކުވެސް ފްލެޓް އެޅުމަށް އެންމެ އެކަށޭނަ ބިމެއްގޮތުގައި ސަރުކާރަށް ފެނިލެއްވީ ޢަރަބި އިސްލާމީ ތަޢުލީމު ދޭ ހަމައެކަނި ސްކޫލް ހުރި ބިމެވެ. ޢަރަބިއްޔާ ހުރި ބިމުގައި ޕްލެޓް އެޅުމަށް ކަނޑައަޅައި އެތާގައި ފެލެޓް ބިންގާ އަޅާނޭ މުއްދަތު މިދިޔަ ހަފުތާތެރޭ ސަރުކާރުންވަނީ އިއުލާން ކުރައްވާފައެވެ. ފާހަގަކޮށްލަން ޖެހޭ ނުކުތާއަކީ ޢަރަބިއްޔާގެ ބެލެނިވެރީންނާއި ދިވެހި އެތަކެއް ރައްޔިތުން އަރަބިއްޔާގެ ޙައްޤު ލިބިދިނުމަށް ރޮއެ އާދޭސް ކޮށްފައިވާއިރުވެސް އެތަނުގެ ޙައްޤު ލިބިދޭނޭ ދުވަހެއް ސަރުކާރުން އިޢުލާން ކުރައްވާފައިނުވާކަމެވެ. ޢަރަބި އިސްލާމީ ތަޢުލީމު ދޭ ހަމައެކަނި ދެ މުއައްސަސާޔާމެދު ސަރުކާރުން އިހުމާލުވެފައިވާކަމެވެ.
މީހުން ދިރިއުޅޭ ރައްރަށުގައި ބަނގުރާ ވިއްކުމާބެހޭ ޤަވާއިދެއް ހެދުމާއި(މުޒާހަރާ ކޮށްގެ ދިވެހި ރައްޔިތުން ހުއްޓުވި ޤަވާއިދު)، މުސްލިމުންގެ އެންމެ ބޮޑު އަދާވާތްތެރިން، އަދި މިއަދުވެސް މުސްލިމުންގެ މުޤައްދަސް ތިން މިސްކިތުގެ ތެރެއިން މުސްލިމުންގެ ފުރަތަމަ ޤިބްލަ އަލް މަސްޖިދުލް އަޤްސާ ބިމާ ހަމަކޮށްލަން މަތިހަށިނަގައި މަސައްކަތް ކުރަމުންދާ މީހުން، މުސްލިމުންނާ ހަނގުރާމަކޮށް މުސްލިމުންގެ ބިންތައް ޣަޞްބުން ފޭރިގަންނަމުންދާ، އަދި ފޭރިގެންފައިވާ ޔަހޫދީ ޒަޔަނިސްޓް ޖަމާޢަތެއް ދިވެހި ޤައުމަށް ލޮލުގެ ފަރުވާ ދިނުމުގެ ނަމުގައި އެތެރެކޮށް ދިވެހި ރައްޔިތުންގެ ޝުޢޫރަށް މިއަދުގެ ސަރުކާރުން ވަނީ ކޮޅުފައިން ޖަހައިފައެވެ.
އެކަށީގެންވާ ވަރަށް ދީނުގެ ތަޢުލީމާއި ތަރުބިއްޔަތު ނުލިބުމުގެ ސަބަބުން މަގުމަތީގައި ކާލިއެޅެމުންދާ ޒުވާނުންގެ ޢަދަދު އިންތިހާޔަށް ގިނަވެ، މުޅި ޤައުމު އިޖްތިމާޢި ބަލިމަޑުކަމެއްގެ ތެރެއަށް ވެޓިފައިވާއިރު މަތީ ޘާނަވީ ކުލާސްތަކުގައި އިސްލާމް ދިވެހި އިޚްތިޔާރީ މާއްދާއަކަށް ހެދުމަށް ނިންމުމާއި، ވަށާޖެހޭ ތަޢުލީމުގެ ތެރެއިން ސްކޫލްތަކަށް އެންމެ ފައިދާހުރި ގޮތަކީ އެއް ދަންފަޅިއަށް ކިޔަވައި ދިނުންކަމުގައި ދެކެވަޑައިގެ އެ ސިޔާސަތު ތަންފީޛް ކުރަމުން ދިޔުމާއެކުވެސް ކުއްލިޔާގެ މައުޙަދު ބައިގައި ކިޔަވަމުންދިޔަ ދަރިވަރުން ޖާގައިގެ ދަތިކަން ފޮރާފައިވާ ޢަރަބިއްޔާއަށް ބަދަލުކޮށް ދެދަންފަޅިޔަށް ކިޔަވައިދީ، ޘާނަވީ އާއި މަތީ ޘާނަވީ މަރުޙަލާގައި ވަކި މާއްދާތަކެއް ކިޔަވާ ދަރިވަރުންނަށް ލިބިދޭންޖެހޭ ލެބޯރޓަރީގެ ޚިދުމަތުން ޢަރަބިއްޔާ ދަރިވަރުން މަޙުރޫމްކޮށްފައިވަނީވެސް މިއަދުގެ ސަރުކާރުންނެވެ.
މަތީގައި ބަޔާންވެދިޔަ ކަންތައްތަކާއި އެއިގެ އިތުރުންވެސް ދީނާ ދުރު ޚިޔާލުތަކަކާއި ސިޔާސަތުތަކެއް ދިވެހި ސަރުކާރުންދަނީ ފާޅު ކުރައްވަމުންނެވެ. އެހެނެއްކަމަކު ހިތާމަކުރަންޖެހޭކަމަކީ މިހުރިހާކަމެއްގެ ކުރިމަތީގައި ބައެއް ދިވެހިން ކަނުބައެއްގެ ގޮތުގައި ވެގަންނަކަމެވެ. ވެގެންފައިވާކަމެވެ. ސަރުކާރުން، ނުވަތަ ރައީސް ނަޝީދު ކިތަންމެ ގޯސްކަމެއް ކުރެއްވިޔަސް، ކިތަންމެ ގޯސް ވާހަކައެއް ދެއްކެވިޔަސް އެކަމުގެ ދިފާޢުގައި ވަކާލާތުކޮށް، އެކަމަކީ ނުވަތަ އެކަންކަމަކީ މައްސަލައެއް ނޫންކަމުގައި ދެކޭކަމެވެ.
ސިޔާސީ ޕާޓީތަކާއި މަދަނީ ޖަމްޢިއްޔާ ޖަމާޢަތްތަކުން ދީނުގެ ޙައްޤުޤައި ތެދުވުމުން އެއީ ސިޔަސީ މަޤްޞަދުތަކެއް ޙާސިލް ކުރުމަށް އުޅޭބައެއް ކަމުގައި ތުހުމަތުކޮށް ލާދީނީ ފިކުރު ޙިމާޔަތްކުރުމުގައި އެމް ޑީ ޕީ ގެ ބައެއް މެމްބަރުން ވާހަކަ ދައްކަމުންދަނީ އެއްވެސް ފަރުވާލެއްނެތިއެވެ. ތިމާގެ ދީނަށްވުރެ ޕާޓީ މަސްލަހަތު ކުރިޔަށް ނެރެގެންނެވެ.
އިސްލާމިކް މިނިސްޓަރީގެ ކުރީގެ ސްޓޭޓް މިނިސްޓަރ ޝައީޚް ޝަހީމާއި، އެހެނިހެން ސިޔާސީ ފަރާތްތަކުން ޔަހޫދީންގެ މައްސަލަޔާއި، ޢަރަބިއްޔާ މައްސަލަ، އަދި ތަޢުލީމި ސިޔާސަތުގެ މައްސަލާގައި މުޒާހަރާ ކުރެއްވީ ސިޔާސީ މަޤްޞަދަކަށްޓަކައި ކަމަށްބުނެ ޕާޓީގެ ލާދީނީ ފިކުރު ޙިމާޔަތް ކުރުމަށް މަސައްކަތް ކުރަމުންދާ އެމް ޑީ ޕީ ގެ މެމްބަރުންނޭވެ! އެބޭފުޅުން ސިޔާސީ މަޤްޞަދު ޙާސިލުކުރުމަށް މުޒާހަރާ ކުރެއްވި އިރު، ޕާޓީދެކެ ނުހަނު ލޯބިވާ، ޕާޓީގެ އިސްލާމްދީނުގެ މަޝްވަރާ މަޖިލީހުގެ ރައީސް މުސްކުޅި ޝައިޚް އާދަމް ނަސީމް (ބީއޭ) އިސްތުފާ ދެއްވީ ސިޔާސީ ކޮން މަޤްޞަދެއް އޮވެގެންތޯއެވެ؟ އެމަނިކުފާނު އިސްތިއުފާ ސިޓީގައި ފާހަގަ ކުރެއްވީ ކޮން ކޮން މައްސަލަތަކެއް ތޯއެވެ؟
